فيلم الجوكر لخواكين فينيكس محقق لحد دلوقتي ارقام قياسيه في السينما العالميه وحتى في شباك التذاكر المصريه ودي من المرات القليله الي فيلم امريكي من فتره طويله يبقى حديث الناس على المقاهي ووسائل التواصل الاجتماعي
عرض المرض النفسي وابعاده شيء مش بيتكرر كتير في السينما , كلنا بنخاف من المجرم من السيكوباث بس حد دخل جواه ؟ تعمق في تفاصيل يومه ؟ في اسبابه ؟ في دوافعه ؟ في نظرته للحياه ؟
هتحس وانت بتتفرج انك لابس لبس البلياتشو لانك زيه بتعاني زيه بتتوجع زيه بتحاول تضحك الي حواليك في واقع بائس يدعو للحزن اكتر من الفرح ومستخبي وراء قناعك الشخصي وهتحس ان ضحكته الي بتشوفها على الشاشه هي ضحكه ساخره وفيها الم كانعكاس للواقع المضحك المبكي
(وَكَمْ ذَا بِمِصْرَ مِنَ المُضْحِكَاتِ وَلَكِنَّهُ ضَحِكٌ كَالبُكَا)
احيانا عشان تعيش لازم تخبي وشك وحزنك وراء قناع البلياتشو وراء الميكب والزينه والضحكه المصطنعة
لكن الفيلم هنا بيجيبلك اللحظات الي بيختلي فيها الجوكر ا المريض النفسي بنفسه
الامراض النفسيه والذهان خصوصا هي من اصعب الامراض النفسيه الي بتخليك طول الوقت بتهرب من الواقع بسبب ضعفك في مواجهته وبسبب مرضك بتخلق عالم موازي بتعيش فيه ولما بتتصدم بالواقع المرير وترجع تاني للارض ممكن لو عندك القابلية انك تتحول الى مجرم او شخص ميقدرش يتحكم في انفعالاته من غير ادويه و هتبقى مجرم عتيد
الفيلم بيوريك ان المريض النفسي لو خرج بره الاطار الي انت راسمه ليه وبطل ياخد ادويه واتعامل بشخصيته الحقيقيه بدون رتوش انت كشخص ظالم هتبقى اول الناس الي هتتأذي منه لانك اكيد أذيته قبل كده
هتتفاجئ ان تقريبا اغلبنا جوكر اكترنا بلياتشو وكل واحد بطريقته وبمرضه النفسي وبمشاكله يقدر يعمل اي حاجه لو قرر ينتقم من الناس والمجتمع والاسباب الي خلته كده .
No comments:
Post a Comment